Heiðabrúðurin eftir barónessuna Emmu Orczy er ástar- og átakasaga. Hún gerist í litlum bæ í Ungverjalandi og aðalsögupersónurnar eru Andor og Elsa. Sagan hefst þegar verið er að kalla Andor í herinn, en við honum blasir þriggja ára herskylda. Elsa heitir því að bíða eftir honum. Þegar Andor kemur ekki heim á tilsettum tíma og fregnir berast um að hann sé látinn felst Elsa á óskir foreldra sinna um að giftast Bela, illa þokkuðum áhrifamanni í bænum. Daginn fyrir brúðkaup þeirra Elsu og Bela birtist Andor og hefst þá spennandi atburðarás.

Emma (Emmuska) Orczy (1865-1947) fæddist í Ungverjalandi og var af aðalsættum, en flutti á unglingsaldri til Englands. Hún gekk þar í listaskóla og kynntist þar listamanninum Henry Montague Barstow, sem varð eiginmaður hennar. Emma fór að þýða og skrifa, fyrst með manni sínum, til að auka tekjur fjölskyldunnar. Hún varð brátt vinsæll höfundur og eftir hana liggur fjöldi verka, skáldsögur og leikrit, auk þýðinga. Vinsælastar sagna hennar eru um Rauðu akurliljuna, en hún gaf út nokkrar bækur um þá söguhetju.

Þess má geta að í þeirri þýðingu sem hér er lesin er einu kaflanúmeri sleppt.

Kristján Róbert Kristjánsson les.