Hér er um afar áhugaverða og fallega skáldsögu að ræða sem gerist í kringum 1920 á Englandi og segir frá því þegar foringi í breska hernum kemur heim eftir að hafa tekið þátt í fyrri heimsstyrjöldinni. Þá uppgötvar hann að konan hans hefur farið frá honum en skilið son þeirra eftir í hans umsjá. Ofan á þetta kemur hann alls staðar að lokuðum dyrum er hann leitar að vinnu til að sjá sér og syni sínum farborða. En þrátt fyrir þessi áföll er Sorrell þessi staðráðinn í að koma syni sínum til manns og veita honum bestu fáanlegu menntun sem hann sjálfur hafði farið á mis við.

Sagan þykir veita einstaka innsýn í breskt samfélag þess tíma og höfundur þykir fanga stéttaskiptinguna, fátæktina og baráttu kvenna á þessum árum af stakri snilld. Það verður enginn ósnortinn af þessari sögu. Sagan naut á sínum tíma mikilla vinsælda og gerðar hafa verið eftir henni tvær kvikmyndir og sjónvarpssería.

Warwick Deeping (1877-1950) var enskur rithöfundur sem naut gríðarlegra vinsælda á árunum frá 1920-1930. Hann var læknir að mennt eins og báðir foreldrar hans og starfaði sem slíkur, en skömmu eftir að hann kom heim frá þátttöku sinni í fyrri heimsstyrjöldinni hætti hann lækningum og sneri sér alfarið að skrifum.

Á íslensku kom sagan fyrst út árið 1944 í þýðingu Helga Sæmundssonar en það er sonur hans, Sigurður Helgason, sem les.