Jerúsalem er stórbrotin skáldsaga sænsku skáldkonunnar og Nóbelsverðlaunahafans Selmu Lagerlöf. Sagan er í tveimur bindum, en hvort um sig er sjálfstæð frásögn. Bækurnar komu út á árunum 1901 og 1902.

Sagan gerist á 19. öld og segir frá nokkrum kynslóðum bænda í Dalarna í Svíþjóð. Í seinni bókinni er aðalsögusviðið Jerúsalem þar sem fylgst er með því hvernig þeim Svíum sem fengið hafa köllun til að þjóna Drottni í borginni helgu reiðir af. Lífið í Jerúsalem er mjög frábrugðið lífinu í sveitum Svíþjóðar og reynist hinum brottfluttu misvel að aðlagast nýjum háttum. Ýmsar prófraunir verða á vegi þeirra og í sögunni skiptast á sorgir og gleði. Sagan er listilega vel skrifuð með nákvæmum lýsingum á ýmsum smáatriðum frá borginni helgu svo lesandinn fær þá tilfinningu að hann sé hreinlega staddur í Jerúsalem. Bókin er spennandi ferðalag um framandi slóðir og hugarfylgsni hins trúaða sem þarf sífellt að berjast við freistingar holdsins og óguðlegar hugsanir.

Snæfríður Ingadóttir les.