Sjómannalíf er stutt en skemmtileg skáldsaga eftir breska Nóbelshöfundinn Rudyard Kipling. Þar segir frá ungum syni auðkýfings sem er á leið á skemmtiferðaskipi til Evrópu með móður sinni. Þá verður hann fyrir því óhappi að detta útbyrðis.

Sagan sem á ensku nefnist Captain Courageous birtist fyrst sem framhaldssaga í tímaritinu McClure's árið 1896 en kom svo út á bók árið 1897. Sagan varð mjög vinsæl og hafa verið gerðar eftir henni kvikmyndir og sjónvarpsseríur auk þess sem hún hefur verið sett á svið sem söngleikur. Á íslensku kom hún fyrst út árið 1907 í ágætri þýðingu Þorsteins Gíslasonar.

Joseph Rudyard Kipling (1865-1936), eða bara Rudyard Kipling eins og hann er best þekktur, var stórvirkur rithöfundur og skrifaði sögur fyrir bæði fullorðna og börn, auk þess sem hann var mikilsvirt ljóðskáld. Kipling, sem fæddist á Indlandi, var fyrsti Bretinn til að hljóta bókmenntaverðlaun Nóbels og var það árið 1907. Í dag er hann einkum kunnur fyrir barnabækur sínar, The Jungle Book (1894) og Just So Stories (1902), sem er nokkur synd þar sem margt af því sem hann skrifaði fyrir fullorðna stendur enn fyllilega undir nafni og á fullt erindi til samtímans. Smásögur hans þóttu mjög hugvitssamlega uppbyggðar og Kipling er almennt talinn hafa víkkað út smásöguformið.

Ingólfur B. Kristjánsson les.